ALDEE IFLAko bazkide egin da
- Mota
- ALDEE. Erakundea
- Data
- 2026 Urria 29
ALDEE Liburuzain eta Liburutegien Elkarteen Nazioarteko Federazioko (IFLA) bazkide egin da. Sektoreko erakunde nagusietakoa eta bertako kide izango gara hemendik aurrera.
IFLA erakundeak eskainitako gonbidapena onartuz, ALDEE Liburuzain eta Liburutegien Elkarteen Nazioarteko Federazioan (IFLA) sartu da ofizialki.
Bazkidetza honekin, gure Elkarteak aurrerapauso garrantzitsua eman du lankidetza profesionalarekin, ezagutza trukearekin eta liburutegien eta informazio zerbitzuen sustapenarekin duen konpromisoan, mundu osoko elkarte, erakunde eta profesionalekin dituen loturak eta harremanak zabalduz.
ALDEEk betidanik babestu eta zabaldu du IFLAren lana. Azken urteotan, esaterako, IFLAren Liburutegi Publikoaren Manifestu eguneratua euskarara itzuli eta argitara eman du. Orain eskuragarri dago bai aldee.eus webgunean (PDF), bai IFLAren webgunean ere.
Parte-hartze honi esker, besteak beste, beste herrialde batzuetan garatutako ekimenak eta proiektuak zuzenean ezagutu ahal izango ditugu, baliabide espezializatuetara jo ahal izango dugu, ezagutzak eta esperientziak trukatu ahal izango ditugu, eta, arestian esan bezala, sektoreko erakunde eta profesionalekiko lankidetza-harremanak sendotu ahal izango ditugu, elkarrekin lan egiteko bide berriak irekiz.